Zuud-Bevelank

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

Zuud-Bevelank (Nederlands: Zuid-Beveland) is 't oeëstelig deel va g'n provins Zieëlank. Zudelig grens 't gebeed aa d'r Westerschelde, noardelig aa Noard-Bevelank en d'r Oosterschelde. Westelig grens Zuud-Beveland aa Walchere en oeëstelig aa g'n provins Noard-Brabant. 't Gebeed besjteet oet de gemingdes Goes, Kapelle-Biezelinge, Borsele en Reijmerswaal. Beiee telt Zuud-Beveland ungeveër 90.000 lüj. I Zuud-Bevelank zint de mieëtste lüj gerifformeerd-protestants. Vruëger besjtóng 't gebeed oet sjlikke en sjorre mit eileng, die sjpieëder bietsjke bei bietsjke igepolderd woeëde. Dees polders kinmerke zich döks durch 'n kling óppervlaak. 't Lanksjap is heidurch aafwisselend, mit dieksjkes, weie en bóngedsj. In 't gebeed óntsjtónge in de Middelieëwe versjillende sjteë, wie Goes (de groeëtste va Zuud-Bevelank mit 26.920 lüj in 2010), Kapelle, Borssele, Kruiningen en Yerseke. Yerseke sjteet óch bekank óm zing mósjele en oesterindustrie. De res van 't gebeed weëd gebroek vuur lankboew. Zuud-Bevelank vangk óch 't groeëtste deel van 't verkier i Zieëlank op. D'r wichtigste weëg is d'r autosjnelweëg A58. Wier guëf 't nog e kót sjtuk autosjnelweëg bei Goes: d'r A256. D'r A256 geet uëver i d'r N256 noa Noard-Beveland en Sjouwe, deë uëver g'n bekanke vunnef kilometer lange Zieëlankbruk lup. Anger wichtige weëg zint d'r N62, d'r N254 en d'r N289. D'r N62 lup via de in 2003 geöapende Westerscheldetunnel noa Zieëws-Vlaandere. D'r lup óch inne ieëzerweëg va Bergen op Zoom noa Vlissingen.

In de categorie Zuid-Beveland van Wikimedia Commons zeen media gerelateerd aan dit óngerwerp te vènje