Umayyaden

D Umayyade (arabisch الأمويون‎, DMG al-ʾUmawiyyūn oder بنو أمية‎ banū ʾUmayya) – au Omayyade, Omajjade, Omaijade, Omajade – si e Familieklan vom arabische Stamm vo de Quraisch us Mekka gsi, dr Stamm, wo au dr Brofeet Mohammed drzue ghört het. Aaghöörigi vo dr Familie häi vo 661 bis 750 noch dr Zitwändi as Kalife vo Damaskus us über s islamische Imperium, wo denn no jung gsi isch, gherrscht. Si häi die ersti dünastischi Herrscherfolg in dr islamische Gschicht gründet. Under iirer Regierig isch iir Riich im Osten bis zum Indus und im Weste bis zur Iberische Halbinsle vergröösseret worde. Nochdäm si vo de Abbaside us em Oriänt verdriibe worde si, häi si 756 in al-Andalus s Emirat vo Cordoba gründet. Dört häi bis 1031 gherrscht, sit 929 au wider mit em Ditel vom ene Kalif.