Schwangerschaft

D Schwangerschaft (medizinisch Gestazioon oder Graviditäät, latiinisch graviditas) isch dr Zitruum, wo wääred em e befruchdeti Äizälle im Körper von ere Frau zum e Chind waggst. D Schwangerschaft duurt vo dr Befruchdig bis zur Geburt om Durchschnitt 266 Dääg.^[1] In de erste acht Wuche noch dr Befruchdig vo dr Äizälle reedet mä vom en Embryo. Wenn emol die innere Organ usbildet si (vo dr nüünte Entwiggligswuche aa) brucht mä d Bezäichnig Fetus oder Fötus.

Vo Schwangerschaft schwätzt mä nume bim Mensch; bi andere Süüger säit män em entsprächende Zuestand Drächdikäit. In dr Mundaart und in dr eltere Sprooch gits no anderi Wöörter für «schwanger» und «drächtig», zum Biispiil trääged / traaged, grooss, in dr Hoffnig, in andere Umständ, i gsäägnete Umständ, in Erwaartig sii oder mit eme Chind goo.^[2]

Zum de Chind nid müesse säge, vo woo dass s chöme, het mer ene zem Biispil gsäit, me häi si vom Chindlistäi ghoolt.

1. ↑ Joachim W. Dudenhausen, Willibald Pschyrembel, Michael Obladen, Dieter Grab: Praktische Geburtshilfe. Walter de Gruyter, Berlin/Boston 2011, ISBN 3-11-022869-6, S. 19.
2. ↑ Matthias Friedli: Von schwangeren Katzen und «grossen» Frauen. Woortgschicht vom 10. Juli 2023, uusegee vo dr Redakzioon vom Schwizerische Idiotikon.