Materialismus

Dr Materialismus isch en erkenntnistheoretischi oder ontologischi Posizioon, wo alli Vorgäng und Fenomeen uf dr Wält uf Materie und deren ihri Gsetz und Verheltniss zruggfüert. Dr Materialismus goot au drvo us, ass Gedanke, Gfüül oder s Bewusstsii Erschiinigsforme vo Materie si bzw. uf sonigi chönne zruggfüert wärde. Er erklärt d Wält, wo dr Mensch din läbt und d Brozäss wo in ere ablaufe ooni gäistigi bzw. immaterielli Elimänt, wie zum Bischbil Gott oder d Seel. In dr Gegewartsfilosofii wird dr Begriff „Füsikalismus“ vilmol as Sünonüüm vo „Materialismus“ verwändet. Gegebegriff si dr Idealismus, wo für en nume d Inhalt vom Bewusstsii äigentlig wirklig si, und dr Dualismus, wo säit, ass s Füsische und s Psüchische zwi Beriich vom Sii daarstelle, wo vollständig vonenander drennt si und äigeständig existiere.