D Exzellänziniziatiive vom Bund und de Länder zur Förderig vo dr Wüsseschaft und dr Forschig an dütsche Hochschuele isch e Förderbrogramm gsi, wo 2005/06 z Dütschland gstartet worde isch und gliichzitig mit em Bolonia-Brozäss gloffe isch, wo s Hoochschuelwääse vo Grund uf gänderet het. Es isch vo 2017/18 dur d Exzellänzstrategii abglööst worde, wo 2019 mit dr Fürderig vo Uniwersidääte aagfange het. D Exzellänziniziatiive isch d Reakzioon vo dr Bundesregierig uf s Lissabon-Brogramm vo dr EU us em Joor 2000 gsi. In däm häi sich d EU-Mitgliidstaate verpflichdet, in iiri Bildigs- und Wüsseschaftssüsteem z inwestiere, und eso Öiropa bis 2010 zum wettbewärbsfähigste und dünamischste wüssesgstützte Wirtschaftsruum vo dr Wält z mache. Mit dr Exzellänziniziatiive het mä dr Wüsseschaftsstandort Dütschland noochhaltig welle versterke, sini internazionaali Wettbewärbsfähigkäit verbessere und d Spitzeforschig an dütsche Hoochschuele sichtbar mache.[1]