Vi Hilbert

Vi Hilbert (boorne Anderson, Lushootseed: Taqʷšəblu; * 24. Juli 1918 bi Lyman, Washington; † 19. Dezember 2008) weer ’n Stamms-Öldste vun de Upper-Skagit-Indianers. Dat is een vun de Puget-Salish-Stämmen in’n amerikaanschen Staat Washington.

Ehr Öllern weern Charlie un Louise Anderson. Charlie was ’n Fischer, Hultarbeider un Kanuboer. Sien Kanu mit Naam „Question Mark“ (Fraagteken) findt sik nu in’t Archiv vun’t Smithsonian Museum in de amerikaansche Bundshööftstadt Washington.

Vi Hilbert hett sik al lang daarför afräten, dat wi vun ehr Lushootseed-Spraak un -Kultuur wat afwäten doot, ehrder dat se utstorven sünd. Se hett an Grammatiken un Wöörböker vun’t Lushootseed mitwarkt, hett ole Vertellen tomehrst tweesprakig in Böker, Toon- un Video-Upnahmen un in Vördrääg’ ünner de Lüüd’ bröcht, un se hett annere Minschen de Spraak bibröcht, ok an de Universität vun Washington in Seattle.

1989 wöör Vi Hilbert as Washington State Living Treasure („lävener Schatt“ vun’n Staat Washington) nöömt, un se kreeg ’n National Heritage Fellowship vun’t National Endowment of the Arts, ’n Pries, den ehr Präsident Bill Clinton 1994 övergeev.