Ny Onjatsy dia foko ao amin' ny vondrom-poko antemoro sy antambahoaka koa, ao amin' ny tapany atsimo-atsinanan' i Madagasikara, ao amin' ny faritra Vatovavy sy Fitovinany, ao amin' ny morona tsimon' i Matitanana, mpihavana amin' ny Anjoaty any avaratra-andrefana amin' i Madagasikara sy ny Onjatsy any avaratra-atsinanana (indrindra any Vohimaro) sy any amin' ny Sakalava. Araka ny lovantsofina dia efa talohan-dRamakararo sy Ramalitavaratra ary Andriantsimeto Ranaha no nahatongavan' ny razambeny tao amin' ny faritra misy ny Antemoro, nefa nanaiky ho vahoakan-dRamakararo ny Onjatsy. Nikomy tamin' ny Anteony ny Onjatsy taty aoriana, tahaka ny Ampanabaka, tamin' ny taona 1881-1884, ka lasa foko mpanombily ankoatran' ny Anakara, ny Anteony, sy ny hafa.