Mark Rutte

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Mark Rutte (D'n Haag, 14 fibberwarie 1967) is 'ne VVD-politicus en waor vaan 14 oktober 2010 bis 2 juli 2024 premier vaan Nederland. Oonder 't premiersjap vaan Jan Peter Balkenende waor heer vaan 2002 bis 2004 staotssecretaris vaan Sociaal Zake en Wèrkgelegeheid en vaan 2004 bis 2006 staotssecretaris vaan oonderwies, cultuur en wetensjappe. In 2006 naom heer 't leiersjap vaan zien partij, de VVD, euver vaan Jozias van Aartsen. Op 14 oktober 2010 naom heer 't premiersjap euver vaan Balkenende. 't Kabbinèt-Rutte I waor e minderheidskabbinèt vaan de 31 zedels tèllende VVD en de 21 zedels tèllende CDA. 't Kabbinèt had evels 'n tolerantiepolletiek mèt de PVV, op weens steun de VVD kós rekene. Dat bleek evels neet 't geval wie op 21 april 2012 de PVV häöre steun introk nao zeve weke oonderhandele in 't Catshuis. 't Bleef e demissionair kabbinèt bis 23 april 2012. Op 5 november 2012 woort 't kabbinèt opgevolg door 't Kabbinèt-Rutte II. Dit kabbinèt woort op 26 oktober 2017 opgevolg door 't Kabbinèt-Rutte III. Heer waor de premier oonder zien vierde kabbinèt, 't Kabbinèt-Rutte IV vaan 10 jannewarie 2022 bis 2 juli 2024. Dit bestaonde oet 'n coalitie vaan veer partije: VVD, D66, CDA en CU.

Sinds 1 oktober 2024 is Rutte secretair-generaal van de NAVO.