Religio

Religio esas kulturala sistemo di konduti e praktiki, vidopunti pri la mondo, l'etiko e la social organizuro qui relatas homaro a la supernaturajo, trancendanteso, e spirital elementi. Tamen, ne existas singla erudita opiniono pri "quo precize konstitucas ula religio".^[1]

Multa religii anke havas naraci, simboli e sakra historii qui intencas explikar la senco di la vivo, o l'origino di la vivo o dil universo. Segun lia kredajo pri la kosmo e homala naturo, ula individuo povas adoptar specifika moralo, etiko, religiala normo e vivostilo. Existas, segun kelka statistiki, cirkume 4.200 religii praktikata en la mondo, e sennombra plusa altra religii extingita.^[2]

Religio esas fenomeno qua existas en omna kulturi, de la prehistorio til num. Dum Paleolitiko e dum granda parto di la historio di la homaro, religio uzesis por komprenar ed explikar la naturala fenomeni, e probar influar li.^[3] Fenomeni naturala, exemple la klimato, sezoni, la vivo, la morto, la kreado, la vivo pos la morto, e la strukturo dil kosmo esis subjekti por religiala expliki, qui mencionis dei qui kontrolis ica fenomeni, o mencionis loko nevidebla por la homi ma habitata da deaji e mistika enti.^[3] La religio esis la formo por mantenar komuniko, per rituali e pregi, kun ica deaji, ed ica religiala praktiki helpis mantenar la kohero interne la sociala grupi, plufortigar la hierarkio e krear senco pri identeso koletiva.^[3]

1. ↑ Autoro: John Morreall, Tamara Sonn. 50 Great Myths of Religion.  Publikigita da Wiley-Blackwell.  Dato di publikigo: 2013.  Pagino/pagini: 12-17. Videz chapitro: Myth 1: All Societies Have Religions.
2. ↑ Un planeta con 4.200 religiones vivas e incalculables creencias ya extinguidas - Dato di publikigo: 25ma di decembro 2013. 
3. ↑ ^{3,0 3,1 3,2} Autoro: Bruno Alxander (tradukero a la Portugalana)). O Livro das Religiões (tradukita del Angla The religions book).  Publikigita da Editora Globo S.A..  Dato di publikigo: 2013.