Drintske Aa

De Drintske Aa (Nederlânsk: Drentsche Aa) is in streamke yn de provinsjes Drinte en Grinslân. De 28 km lange stream ûntspringt op in hichte fan 16 m op it Drintsk Plato en einiget yn it Noard-Willemskanaal yn Grinslân op 0,65 m hichte. It Noard-Willemskanaal einiget wer yn 'e Lauwersmar en Waadsee.

Yn Grinslân en Drinte is it streamke bekend as de Drintske Aa (somtiden inkeld Aa yn Grinslân). Yn Drinte binne der lykwols noch mear lokale nammen lykas it Deurzerdiep, Looner Diep, Taarlosche Diep, Oudemolensche Diep, Schipborgsche Diep, en Westerdiep. In grut part fan it streamgebiet fan de Drintske Aa leit yn it Nasjonaal Gea Drintske Aa.

Fanâlds mûne de Aa út yn 'e Hunze by Adoarp. Yn 1385 waard in diel fan de Aa tusken Dorkwerd en Adoarp ôfsletten en der waard in kanaal dold fan Dorkwerd nei it Ryddjip, sadat it wetter tenei de Lauwersmar yn streamde. It Hoornsediep by de Paterswoldsemar lâns is in oerbliuwsel fan it streamke. Yn 'e stêd Grins dogge de strjitnammen Hoge der A en Lage der A en de Aa-tsjerke noch tinken oan it streamke.