Kongo Burazavilu (òrere République du Congo me usem Furenchi, Repubilika ya Kôngo me usem Kituba, Republic of the Congo mè Congo-Brazaville me usem Ebeke) ìre ido òkup me agba okwaan̄ agan̄ ichep-ura me Afirika agan̄ Etete. Ido ìtatap ikana ọmọ ìre Gabọn̄ me agan̄ ichep-ura, Kamerun me agan̄ inyọn̄ ichep-ura, Ido Afirika Etete me agan̄ inyọn̄ mbum-ura, Kongo Kinshasa me agan̄ osiki mbum-ura, Kabinda eyi Angola me agan̄ osiki, sà Emen-awaji Atilantik okup me agan̄ osiki ichep-ura kan̄. Usem mkpulu me ido ya ìre Furenchi. Usem ido [national language] ìre usem Kituba mè Lingala.

Otoko echi òkup me ido ya ìre Kongo (40.5%), Teke (16.9%), Mbochi (13.1%), Sangha (5.6%), ofifi ebi Afirika mè ebi Yurop (23.9%). Me acha 2015, eru-mfaka me ido ya ìre Eru-mfaka Kiristien (88.5%), Eru-mfaka Orọmijọn̄ (4.7%), ebi kpegọọk eru-mfaka geege (3.0%), ofifi kechilọ (2.3%), ebi kpetumu isibi eyi ema ekigọọk (1.5%). Uwu ikan kiban̄ ìre eyi agwut iba. Okike ijọn̄ ido ya obenbe ìre 342,000 km²; ọmọ ore òso 64 òmimin ichit. Otu-ifuk ebi ìluk me ido ya ìre 4,244,359. Ikpoko ema ekisa inyam ewe ìre franc eyi Afirika Etete (me mgbidim: XAF). Me ido ya, ekikọp ujijọn̄ me agan̄ ulom. Iman̄ ibot ǹgwen kiban̄ ìre +242, sà iman̄ ibot akpatan̄ etip ore .cg.