Imperio Britanico

Imperio Britanico British Empire
1485-1997
As arias en color rosa indican os territorios que en un inte u atro han feito parti de l'Imperio Britanico a traviés d'a historia.
Gubierno	Monarquía

Se conoixe como Imperio Britanico a las tierras que pendeban politicament y economica d'o Reino Uniu de Gran Bretanya. O momento de mayor importancia de l'Imperio estió a prencipios d'o sieglo XX, probablement entre 1890 y 1910, cuan teneba una población d'entre 400 y 500 millons de personas y bels 31 millons de kilometros cuadraus, lo que significaba alto u baixo una cuarta parti d'a población mundial y dos cinquenas partis d'as tierras emerchidas.

L'imperio se desembolicó mientres uns 300 anyos, a traviés d'una serie de fases relacionadas con o comercio, la colonización y a conquista en las que estendilló as suyas mugas, antimás de periodos d'actividat diplomatica.

Gracias a l'Imperio Britanico a tecnolochía, o comercio, l'idioma anglés y o gubierno britanicos s'esbandioron por tot o mundo. A hechemonía imperial contribuyó a l'espectacular creiximiento economico de Gran Bretanya y a lo peso d'os suyos intreses en o escenario mundial.

O primero en emplegar a expresión "Imperio Britanico" estió lo doctor John Dee, astrologo, alquimista y matematico d'a reina Isabel I d'Anglaterra.

Bels territorios que han feito parti de l'Imperio Britanico son: Irlanda, Estaus Unius, Canadá, Chamaica, Australia, Nueva Zelanda, India, Malaisia, Echipto, Sudafrica, Nicheria, Camerún, Kenya, Hong Kong, Iraq, Chipre, Chibraltar u Menorca entre muitos atros. Hue en día bels d'istos territorios, ya independients, reconoixen os suyos vinclos con Gran Bretanya a traviés d'a Commonwealth.