Filochenia

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A filochenia fa referencia a la relación de parentesco entre dos sers vivos, especies u taxons en cheneral. O termino s'ha preso tamién en lingüistica historica, secundariament, pa nombrar as relacions en a clasificación d'as luengas humanas en función d'a suya orichen común. En lingüistica, o termino filochenia ye amprau d'a biolochía.

A filochenetica ye a disciplina d'a biolochía sistematica que s'ocupa de determinar a filochenia, y consiste en o estudio d'as relacions evolutivas entre os diferents grupos d'organismos a partir d'a distribución de caracters ancestrals y derivaus en cada taxón, emplegando pa ixe fin matrices d'información de moleculas d'ADN y d'a morfolochía.^[1] Con a información se debuixa os árbols filocheneticos, que son a base d'a clasificación filochenetica d'os sers vivos. A filochenetica fa parte d'as escuelas de biolochía sistematica, en chunto con a taxonomía clasica u linneana, a cladistica y a fenetica.

A necesidat d'ordenar os sers vivos en función d'o suyo parentesco evolutivo comenzó a formar-se con a publicación de The Origin of Species de Charles Darwin en 1859. A incorporación d'as tiorías evolutivas en os procesos de clasificación d'os sers vivos ye un procés que quecara no ha rematau.^[2]

1. ↑ (en) Phylogenetics, en o portal Biology online.org. Consultau o 15 d'abril de 2017.
2. ↑ (en) De Queiroz, K; Gaulthier, J. (1990) Phylogeny as a Central Principle in Taxonomy: Phylogenetic Definitions of Taxon Names. Syst. Zool. (39): 307-322. doi 10.2307/2992353