Wahrheit

Dr Begriff Woored (vo dr indogermanische Wurzle (idg.) *wēr- „Verdraue, Dröiji, Zuestimmig“^[1]) het verschidnigi Bedütige, wie Überiistimmig mit dr Wirkligkäit, ere Datsach oder eme Sachverhalt, aber au ere Absicht oder eme bestimmte Sinn bzw. ere Uffassig, wo normativ als richdig gältet („Truism“ oder Gmäinblatz) oder de äigene Erkenntniss, Erfaarige und Überzüügige (au „Woorhaftigkäit“).

S Adjektiv „woor“ cha aber au ussääge, ass e Sach, e Handlig oder e Person ächt, richtig, räin oder authentisch isch, wemm mä sä am ene bestimmte Begriff misst („E woore Fründ“).^[2] In dr Umgangssprooch cha mä d „Woored“ abgränze vo dr Falschhäit, dr Luug, wo mä absichtlig öbbis säit, wo nid woor isch, und em Irrtum, wo öbbis felschlig für woor ghalte wird.

D Froog, was d Woored isch, ghöört zu de zentrale Brobleem vo dr Filosofii und dr Logik und die verschiidene Theorie häi underschidligi Antworte. Mä cha grob underschäide zwüsche de Frooge noch ere Definizioon vo dr Woored und noch eme Kriterium drfür, öb öbbis z Rächt für „woor“ ghalte wird. In bestimmte formale Semantike wärde Setz Wooredswärt zuegordnet, wo beschribe, öb si in bestimmte Konteggst erfüllt si. Dr Begriff vo dr Bewiisbarkäit, wo zum Bischbil für d Grundlaage vo dr Mathematik vo Bedütig isch, cha mä mänggisch mit sonige semantische Wooredsbegriff in Verbindig bringe, e Bewiis demonstriert denn d Woored.

1. ↑ Iidraag „wahr“ in: Kluge. Etymologisches Wörterbuch der deutschen Sprache; 24. Uflaag
2. ↑ Eintrag „Wahrheit“ im Deutschen Wörterbuch von Wilhelm Jacob Grimm