Kalifat

As Kalifat (arabisch خلافة‎, DMG ḫilāfa) bezäichnet mä d Herrschaft, s Amt oder s Riich vom ene Kalif, also vom ene „Noochfolger“ oder „Stellverdräter vom Gesandte vo Gott“ (خليفة رسول الله‎, ḫalīfat rasūl Allāh). Es isch also e islamischi Regierigsform, wo d Person vom Kalif die sekulari, also wältligi, und die gäistligi Füererschaft in sich veräint. Scho im Mohammed si Staat z Medina het uf eme theokratische Modäll basiert: Dr Mohammed isch dr Füerer vo dr religiööse Beweegig gsi und au dr Herrscher über e Machtberiich, wo dä Glaube gläbt worde isch.

In dr Form خليفة الله (Ḫalīfat Allāh), also „Stellverdräter vo Gott [uf Ärde]“ existiert dr Kalife-Ditel sit de Omajade, wo vo 661 aa regiert häi.^[1] Wil aber noch dr Sure 112 (Al-Ichlās) käi Mensch Gott cha gliich si – nit emol s Oberhaupt vo alle Muslim – stoot die Interpretazioon vom Kalifat noch dr Aasicht vo vile Muslim im Widerspruch zur Leer vom Mohammed.

Wäge dr Noochfolg vom Mohammed isch s im Islam zur groosse Spaltig choo. D Schiite halte dr ʿAlī ibn Abī Tālib für dr rächtmässig Noochfolger vom Brofeet, wääred für d Sunnite das dr Abu Bakr gsi isch, wo sich as Erste chalifat rasuli llah gnennt het.

1. ↑ Crone/Hinds, God’s Caliph