Bairisch

Bairisch (bair. un schwäb. Boarisch) isch e Gruppe vo Dialäkt im Südoschte vom dütsche Sprochruum. Zämme mit em Alemannisch und em Oschtfränkische bilde si die sogenannte oberdütsche Mundarte. Drumm wird Bairisch au Oschtoberdütsch gnennt. Bairisch wird vor allem im (fascht) gliichnamige dütsche Bundesland Bayern, i wiite Teil vo Öschtriich und im Südtirol gschwätzt. Öppe 12 Millione Mensche schwätze Bairisch, dodrvo läbt mee wie d Helfti vonene aber nid z Bayern.