TGV

Die TGV ('n afkorting van die Franse train à grande vitesse, hoëspoedtrein) is die Franse hoëspoedtrein, wat deur die maatskappy Alstom gebou word - dikwels in samewerking met die Kanadese maatskappy Bombardier (Montreal, Quebec). Hy word in Frankryk as 'n nasionale simbool beskou en is nou die mees suksesvolle sneltrein in Europa.

Die TGV bereik gereeld 'n maksimale snelheid van 320 km/h,^[1] alhoewel hy tydens 'n spesiale toetsrit in 2007 al 'n rekordspoed van 574,8 km/h behaal het wat van hom die vinnigste spoorwegtrein ter wêreld maak. Die trein, wat hierdie rekord opgestel het, was wél 'n gewysigde en veral verkorte weergawe van die TGV en is gebruik om die tegniese moontlikhede van dié trein te bepaal.

Die TGV- en soortgelyke Thalys- en Eurostar-treine verbind groot Franse metropole en ry ook op spoorwegverbindings met België, Duitsland, die Verenigde Koninkryk, Nederland, Italië en Switserland.

1. ↑ "scnf.com: TGV. Besoek op 15 November 2017". Geargiveer vanaf die oorspronklike op 12 November 2017. Besoek op 15 November 2017.