Placha

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Una placha (d'o latín < PLAGIA) ye una forma de terreno u relieu que a cheomorfolochía define como una acumulación chunto a lo canto d'a mar de materials de diferents midas ditos sedimentos, destacando as plachas con arena. Os materials pueden estar d'orichen organicos (restas d'escletos y cascas de tipo calsinoso u silicatato) u inorganicos (procedents d'a meteorización de rocas).

En as plachas se produce deriva litoral, un movimiento efectivo d'arena constant en una dirección paralela a la costa como consecuencia d'ondas marinas que chocan a'l bies contra ella. D'esta traza as particlas d'arena son empentatas por as ondas marinas en a superficie d'a placha seguindo a trachectoria d'o frent d'a onda marina, pero cuan a onda retacula, as particlas d'arena no retaculan en ixa dirección y baixan seguindo a linia de mes pendient, perpendicular a la linia de costa, quedando en un punto diferent d'a linia de costa. A onda marina vinient tornará a mover a particla con una trachectoria oblicua respecto a la lina de costa, pa dimpués baixar seguindo a linia de mes pendient dica arribar a un punto d'a linia de costa encara mes luent de l'orichinal.^[1]

As plachas se forman por l'acción d'as ondas marinas y as corrients de deriva litoral que transportan materials a una determinata zona, pero son estructuras que cambeyan constantement tenendo aportacions y perdugas de materials y cal que as aportacions sían mayors u iguals a las perdugas, ta que se forme a placha y contine existindo. Cuan as aportacions de material no pueden compensar a las perdas, a placha desapareixe. Isto se puet veyer de manera prou platera por eixemplo en as plachas d'o Maresme, a on que a construcción de puertos esportivos ha feito que as aportacions de sedimentos que plegaban transportatos por as corrients d'o norte ya no pleguen y as plachas vaigan desapareixendo a moniquet, y por ixo cuan bi ha una perda de material important, debito por eixemplo a un temporal de levant, calgan grans aportacions artificials de material ta rechenerar-las de manera temporal.

1. ↑ (es) Eumenio Ancochea Soto, Francisco Anguita Virella, Fernando Moreno Serrano: Geología Procesos externos. Editorial Edelvives. pp 156, 157