Perestroika

Perestroika (russisch перестройка, sältener au Perestrojka „Umbau, Umgstaltig, Umstrukturierig“) bezäichnet dr Brozäss zum Umbau und zur Modärnisierig vom gsellschaftlige, politische und wirtschaftlige Süsteem vo dr Sowjetunion, wo vom Michail Gorbatschow am Aafang vo 1986 iigläitet worde isch.

Dr Brozäss isch im ene änge Zämmehang mit dr Ufheebig vo de Iischränkige vo dr Mäinigs- und Pressfreihäit in dr Sowjetunion under em Schlagwort Glasnost (wörtlig: Offehäit, Reedfreihäit, Informazionsfreihäit) gstande. Dr Begriff het sich uf witi Däil vo dr Gsellschaft bezooge und het im witere Sinn d Demokratisierig vom Staat vo 1986 aa bedütet. Öbbis vom erste wo im Raame vo dr Perestroika gänderet worde isch, isch gsi, ass d Direktive vo dr Partei in dr Politik vo dr Zentralverwaltigswirtschaft nüme so strikt gsi si und d Betriib häi vo 1987 e Hufe sälbstständig döfe entschäide. Die Iifüerig vo de erste Elimänt vo dr Marktwirtschaft isch e bedütende Iischnitt in dr Era vom Sozialismus gsi.