Pasifae

Pasifae hè un parsunaghju di a mitulugia greca, figlia di Eliu è di Perseidi, una ninfa uceanina. Hè a matri di u Minotauru. Moglia di Minossu, rè di Creta, da eddu ebbi ottu figli, frà i quali Androgeu, Fedra è Arianna sò i più ricurdati. Sicondu a virsioni più cumuna di u mitu, Poseidonu inviò à Minossu un toru bianchissimu affinch'è eddu fussi sacrificatu in u so nomu. U rè di Creta parò ùn ubbidì à u diu, cunsidarendu troppu beddu quidd'animali è ni sacrificò un antru: a vindetta di Poseidonu ùn tardò ad arrivà. Infatti indussi in Pasifae una passioni scema par l'animali è li feci disidarà ardentamenti di accuppià si incun eddu. Accicata da u desideriu, chersi aiutu à Dedalu, chì s'era rifughjatu à Creta par sfughja una cundanna par umicidiu, chì li custruì una vacca di legnu cava in a quali pudia entra par pudè suddisfà a a so ceca voglia. Cusì Pasifae riiscì à cunghjunghja si à u toru, è da a so unioni nascì u Minotauru.