Noach

Noach (au Noah, Noé oder Noe; hebräisch נֹח Noaḥ, נוֹח Nōaḥ „Rueh“, arabisch نوح‎ Nuh, DMG Nūḥ) isch lut em Buech Genesis vo dr Biible dr zäänt Urvater noch em Adam gsi. Wil er sim Glaube immer dröi bliibe isch, het en Gott usglääse, und iim befoole, en Arche z baue, won er denn druf mit siner Familie und eme Bäärli vo jeedere Dierart d Sintflut überläbt het. Noch dr Biible göön alli Völker, wo denn bekannt gsi si, uf em Noach sini Söön zrug. Dr Sem isch dr Stammvater vo de Semite im Middlere Oste gsi, dr Ham vo de dunkelhütige Völker vo Afrika und dr Japhet vo de Öiropäer.

In dr Folg vo de Gschlächter in dr Biible isch dr Noach au dr zäänti Vorfaar vom Abraham, was, wenn dr Abraham e historischi Person weer, wurd bedüte, ass mä dr Noach in s früeje 3. Joorduusig v. d. Z. müesst iiordne.