Kapitalismus

Dr Kapitalismus, vo Kapital, vo lat. „capitalis“ wo uf „caput“ − „Chopf“ zruggoot, bezäichnet uf dr äinte Site e spezifischi Wirtschafts- und Gsellschaftsornig, uf dr andere en Epoche in dr Wirtschaftsgschicht.

Die zentrale Merkmol si umstritte, wil er sich im Lauf vo dr Zit gänderet het und wil s e Hufe Definizione und ideologischi Underschiid git. Allgemäin verstoot mä under em Kapitalismus e Wirtschafts- und Gsellschaftsornig, wo uf em Brivatäigedum an de Brodukzionsmiddel basiert und wo d Brodukzion und dr Konsum über e Määrt greeglet wärde.^[1] Anderi wichdigi Merkmol si d Akkumulazion, wo für mänggi s „Härzstück“ und Hauptmerkmol vom Kapitalismus isch,^[2] und s „Strääbe noch Gwünn im kontinuierlige, razionale kapitalistische Betriib“.^[3]

As Epoche in dr Wirtschaftsgschicht verstoot mä under em Kapitalismus e wirtschaftsgschichtligi Periode, wo noch de Epoche vom Föidalismus bzw. vom Merkantilismus cho isch und hüte no witergoot. Mä däilt d Epoche vom Kapitalismus in underschiidligi Faase oder Entwiggligsstuefe ii.

1. ↑ Karl Bachinger, Herbert Matis: Sozioökonomische Entwicklung: Konzeptionen und Analysen von Adam Smith bis Amartya K. Sen. Band 3074, UTB 2008, ISBN 978-3-8252-3074-6, Site 75-76
2. ↑ Härzstück: Gerhard Willke: Kapitalismus. Campus, Frankfurt am Main 2006, S. 16. Hauptmerkmol: Luc Boltanski und Ève Chiapello: Der neue Geist des Kapitalismus. UKV, Konstanz 1999, S. 39.
3. ↑ Für dr Max Weber isch s Strääbe noch Gwünn und immer nöje Gwünn im kapitalistische Äinzelbetriib mit em Kapitalismus identisch, wääred s äifache „Strääbe noch Gwünn, noch Gäldgwünn, noch mögligst hoochem Gäldgwünn" mit em Kapitalismus an sich nüt z due häig. Vgl. Max Weber: Gesammelte Aufsätze zur Religionssoziologie. Mohr, Tübinge 1963, S. 4. D Definizion vom Weber korrespondiert mit dr Definizion vom Marx vo dr kapitalistische Brodukzionswiis, wo noch ere d Gwünn in dr Brodukzion (Meewärtbrodukzion) entstöön.