Hauspferd

Ross
Dülmener Wildross im Merfälder Bruch
Systematik
Überordnig: Laurasiatheria Ordnig: Umbaarhuefer (Perissodactyla) Familie: Rösser (Equidae) Gattig: Rösser (Equus) Art: Wildross (Equus ferus) Underart: Ross
Wüsseschaftlige Name
Equus ferus caballus
Linnaeus, 1758

S Ross (Equus ferus caballus) isch e wit verbräitets Hus- bzw. Nutzdier, wo s e Hufe Rasse von em uf dr ganze Wält gitt. In Dütschland wärde öbbe e Million Ross ghalte (Stand 2006).

S Ross isch die domestizierti Form vom Wildross (Equus ferus), wo mit de Esel und de Zebra d Familie vo de Rösser (Äihuefer, Equidae) innerhalb vo dr Ornig vo de Umbaarhuefer (Perissodactyla) bildet.

Mä underschäidet zwüsche Vollblüeter, Ross wo für e Ritsport brucht wärde, und Chaltblüeter, wo as Arbetsross iigsetzt worde si. D Warmblüeter si Chrüzige vo Voll- und Chaltblüeter, wo d Gschwindigkäit vo de Vollblüeter und s guetmüetige Tämpramänt und d Robusthäit vo de Chaltblüeter kombiniere. D Pony si chliini Rössli wo under 1,48 m hooch si.

Bis zur Erfindig vom Verbrennigsmotor isch s Ross äins vo de wichdigste domestizierte Dier gsi und si si in dr Landwirtschaft und im Dransbortwääse iigsetzt worde.