Geometrie

D Geometrii (altgriech. γεωμετρία geometria ‚Ärdmaass‘, ‚Landmässig‘) isch e Däilgebiet vo dr Mathematik.

Uf dr äinte Site verstoot mä under Geometrii die zwäi- und dreidimensionali euklidischi Geometrii, d Elementargeometrii, wo au in dr Schuel underrichtet wird und wo sich mit Pünggt, Graade, Eebene, Abständ, Winggel etc. beschäftigt, und die Begriffsbildige und Methode, wo im Lauf vo dr süstematische und mathematische Behandlig vo däm Thema entwigglet worde si.

Uf dr andere Site umfasst dr Begriff Geometrii e Räije vo groosse Däilgebiet vo dr Mathematik, wo Läie nume schweer chönne gsee, ass sie e Bezuug zur Elementargeometrii häi. Zu dene ghööre

• d Differenzialgeometrii, wo Methode vo dr Analysis und der Topologii aagwändet wärde.
• die algebraischi Geometrii, wo mä au as Gebiet vo dr Algebra cha aaluege und wo sit em Bernhard Riemann au Kenntniss us dr Funkzionentheori aawändet.
• d Konwexgeometrii, wo dr Hermann Minkowski begründet het.
• die sünthetischi Geometrii wo dr klassisch Aasatz vo dr räine Geometrii witerfüert und as Basis nit algebraischi Objekt (Koordinate, Morphisme usw.) het sondern abstrakti geometrischi Objekt (Pünggt, Graade) und deren iiri Bezieige (Schnitt, Parallelidäät, Orthogonalidäät usw.) het
• die algorithmischi Geometrii (computational geometry)
• die diskreti Geometrii wo sich mit Polyeder, Pflasterige, Packige vo dr Eebeni und vom Ruum, Matroide usw. beschäftigt.