Fortpflanzung

D Furtpflanzig vo Lääbewääse isch d Reprodukzioon vo genetisch idäntische oder sust artgliiche Indiwidue. Eltereorganisme broduziere drbii Noochkomme. D Furtpflanzig stellt sicher, ass Indiwidue von ere nöije Generazioon (Noochwuggs, Noochkommeschaft) entstöön und ghöört zu de Grundäigeschafte vo lääbige Organisme. Si isch vilmol mit dr Vermeerig innerhalb vo dr Art verbunde und ooni sä cha d Art nid überlääbe.

Wäge de Zällarte, wo sich d Noochkomme us ene entwiggle, underschäidet mä zwüsche dr gschlächtlige Furtpflanzig (und zwar äi- oder zwäigschlächtlig) uf dr äinte Site, wo über Gschlächtszälle bassiert, also Zälle, wo nit dur d Mitose sondern dur d Meiose entstande si und dorum nume d Helfti vo de Chromosome vo dr Elterezälle häi, und dr ungschlächtlige Furtpflanzig uf dr andere Site, wo bi vile Äizäller, mängge Dier und vor allem bi Pflanze vorchunnt. Bi Pflanze isch die Form vo dr Furtpflanzig mit dr Vermeerig verbunde und wird as vegetativi Vermeerig bezäichnet.

Bi dr gschlächtlige Furtpflanzig wird genetischs Material vo zwäi verschiidegschlächtlige Lääbewääse vo dr gliiche Art, de Eltere, oder vom ene äinzelne Lääbewääse, bezäichnet as Elter, an d Noochkomme witergee, vererbt. Bi dr gschlächtlige Furtpflanzig mit Gschlächtszälle vo zwäi verschiidene Arte bezäichnet mä d Noochkomme as Hübridi.