Buch

Dä Artikel behandlet s Buech as e bundeni Sammlig vo Bletter, wo im Allgemäine beschriibe oder bedruckt si. Für anderi Bedütige vo «Buech» (hoochdütsch «Buch») lueg do.

E Buech isch e Sammlig vo bedruckte, beschriibnige, aagmoolte oder au leere Bletter us Babbiir oder andere, gäignete Materialie, wo bunde si und mäistens au e Iiband (Umschlag) häi. D Unesco definiert s für d Statistiken eso, ass Büecher nitperiodischi Publikazioone sige mit eme Umfang vo 49 Site oder mee.^[1] D UNESCO het 1995 dr 23. April as Wältdaag vom Buech festgläit.^[2]

Au äinzelne Wärk oder groosse Teggstabschnitt, wo in sich abgschlosse si, wärde mänggisch as Buech bezäichnet, bsundrigs wenn si e Däil vom ene Band si. Das isch dr Fall vor allem bi antike Wärk, wo us Büechersammlige, wo zuenander ghööre, bestöön. Bischbil für das si d Biible und anderi normativi religiöösi Häiligi Schrifte, d Eneis und verschidnigi antiki und middelalterligi Gschichtswärk.

Buechteggst, wo elektronisch gspiicheret si, säit mä digitali Büecher (änglisch e-book). En anderi modärni Wariante vom Buech isch s Höörbuech, won e Teggst vorglääse und akustisch ufzeichnet worden isch.

1. ↑ Noch Recommendation concerning the International Standardization of Statistics Relating to Book Production and Periodicals, 19 November 1964. Definitions 6 (a) „A book is a non-periodical printed publication of at least 49 pages, exclusive of the cover pages, published in the country and made available to the public.“ Dütsch z. B. Buchmarkt-College Archivlink (Memento vom 27. Novämber 2012 im Internet Archive)
2. ↑ welttag-des-buches.de Archivlink (Memento vom 1. Jänner 2012 im Internet Archive)